Euskal Herria hedadura handiko lurraldea ez bada ere, eskualde biogeografiko Eurosiberiarra eta Mediterraneoaren artean kokatuta egotea eta bere orografia malkartsuaren ondoriozko estai bioklimatikoen ugaritasuna dela medio, aniztasun eta orijinaltasun biologiko eta ekologiko handiko lurraldea da. Bizkaiko golkoko kostaldetik eta Pirinioetako gailurretatik Ebro ibaiaren Erribera eta Bardeetako estepetaraino, egoera klimatiko, geologiko eta orografiko ugaritara lotutako ekosistemen mosaiko aberatsa eta askotarikoa zabaltzen da.
Zenbat balio du? Zenbat dugu? Zenbat irabazten duzu? Diruaz ari garela, zenbakiak ezinbestean agertzen zaizkigu eta batzuentzat kontuak egitea (diru-kontuak, alegia) matematikarien lehenengo eginkizuna delakoan nago. Baina kontabilitatea beste batzuen esku utzita ere, finantza-arazoetan badu Matematikak zeregin eta zeresana eta ez da lau erregelekin konpontzen den auzia.
Karbonoaren kimika luzaroan ikertu izan bada ere, egun gaiak gori-gorian jarraitzen du. Etengabe ari dira ikerketa-bide berriak irekitzen. Azken bi hamarkada hauetan karbonoaren kimikak izugarrizko iraultza izan du, karbono hutsez osaturik dagoen fulereno izeneko molekula bereziak aurkitu ondoren. Substantzia hauek aukera eta bide berriak ireki dizkiote zientziari. Baina zabaldu-berri den kimika honen ibilbidea hasi besterik ez da egin; gauza asko baitago aztertzeke, oztopo ugari aurkitu dira jada eta asko oraindik ere gainditu gabe daude.
Europako Batasunak 2000. urteko Zientzia eta Teknologiarako Aste Europearraren barruan eta, Europako Partikula Fisikoen Laborategia (CERN), Europako Espazio Agentzia (ESA) eta Europako Hegohemisferioko Behatokiaren (ESO) babesean "Physics on Stage" (POS) delako programa martxan jarri du, euskaraz "Fisika Plazara" deiturikoa.