COVID-19aren txertoaren proba klinikoak eten dituzte Oxford Unibertsitateak eta Astrazenecak
Saio klinikoen III fasean, eten egin dituzte Oxford Unibertsitatea eta Astrazeneca garatzen ari diren txertoaren probak, partaideetako batek osasun-arazo larriak izan dituelako.
Beste zortzi hautagai daude III fasean, eta hori zen, hain justu, itxaropen handiena sortu duenetako bat: Europako zenbait herrialdek dagoeneko eginak zituzten, merkaturatzeko baimena jasotakoan, hura erosteko hitzarmenak.
Baimena lortzeko, ordea, ezinbestekoa da III fasea gainditzea. Lehen bi faseetan, txertoa segurua eta eraginkorra dela probatu behar da, hamarnaka boluntariotan. Hurrengo fasean, eraginkortasuna findu, dosiak zehaztu eta albo-ondoriorik ez duela eragiten bermatzen da, milaka boluntariotan (kasu honetan, 30.000). Orain, boluntarioak izan dituen arazoak txertoak sortuak ote diren argitu arte, eten egin dute ikerketa.
Astrazenecak adierazi duenez, halako gorabeherak ohikoak dira botiken garapenean. Bestalde, aditu batzuek azpimarratu dute gertatutakoak frogatzen duela txertoak garatzeko prozedura gardena eta fidagarria dela.
>> COVID-19aren txertoari buruzko erreportaje zabala, iraileko aldizkarian: COVID-19aren txertoa: osasunaren burujabetza ala ardura soziala?
Gai honi buruzko eduki gehiago
Elhuyarrek garatutako teknologia
Zu idazle
Zientzia aldizkaria
