24 orduz lorik ez egiteak metabolismoan duen eragina ikertu dute

Tartean, eragin antidepresiboa duten metabolito batzuk sortzen direla frogatu dute

Galarraga Aiestaran, Ana

Elhuyar Zientzia

24-orduz-lorik-ez-egiteak-metabolismoan-duen-eragi
Lo-gabeziak metabolismoan duen eragina ikertu dute. Arg. Psych125. CC BY-SA-3.0

Lorik ez egitea eta eguna/gaua zikloa haustea asaldura metaboliko batzuekin lotzen da, esaterako, obesitatearekin eta diabetesarekin. Ondorio horiek hobeto ezagutzeko egindako ikerketa batean, 24 orduz lorik egin gabe igaro ondoren metabolito batzuen kontzentrazioa areagotu egiten dela frogatu dute. Metabolito horien artean, eragin antidepresiboa duten batzuk daude, adibidez, triptofanoa, serotonina eta taurina.

Ikerketa hamabi gizonezko gazteren metabolitoak neurtu dituzte, 24 orduko ziklo arrunt batean (loaldia barne), eta 24 orduz esna egonarazi ondoren. Datuak alderatuta, neurtutako 171 metabolitoetan ikusi dute gehienek gorabeherak izaten dituztela eguna/gaua zikloaren barruan. Ikertzaileen iritziz, gorabehera horien berri izatea oso baliagarria da botikak noiz eta nola hartu erabakitzeko, are eraginkorragoak eta seguruagoak izan daitezen.

Horrez gain, frogatu dute 171 metabolito horietatik, 27ren maila asko igotzen dela lo-gabeziaren ondorioz, tartean, triptofanoarena, serotoninarena eta taurinarena. Ikertzaileen ustez, litekeena da hori izatea lo-gabeziak sortzen duen eragin antidepresiboaren arrazoia. Hala eta guztiz ere, hori baieztatzeko ikerketa sakonagoak beharko liratekeela onartu dute.

Surrey Unibertsitatean, Londresko Minbizi Zentroan eta Erasmus Mediku Zentroan (Herbehereak) egin dute ikerketa, elkarlanean, eta PNAS aldizkarian argitaratu dute.


Gehitu iruzkin bat

Saioa hasi iruzkinak uzteko.

Webgune honek cookieak erabiltzen ditu zure nabigazio-esperientzia hobetzeko. Nabigatzen jarraitzen baduzu, ulertuko dugu cookie horien erabilera onartzen duzla. Ezeztatuz gero, ezingo duzu webgune honetan nabigatu. Onartu
Informazio gehiago
Babesleak
Eusko Jaurlaritzako Industria, Merkataritza eta Turismo Saila
MAIER Koop. Elk.
KIDE Koop. Elk.
ULMA Koop. Elk.
EIKA Koop. Elk.
LAGUN ARO Koop. Elk.
FAGOR ELECTRÓNICA Koop. Elk.