SARS-CoV-2aren infekzio kronikoak aldaera arriskutsuak sortzea errazten du

Elhuyar Zientzia

Zabaldu:
Twitter
Facebook
Emaila

sars-cov-2aren-infekzio-kronikoak-aldaera-arriskut

Infekzio kronikoa duten pertsona batzuek - Arg. Raimond Spekking/CC.

Ikertzaileek ulertu nahi dute nola eboluzionatzen duen birusak pertsona batetik bestera errazago transmititzeko, immunitate-erantzuna saihesteko edo larriagoa edo arinagoa bilakatzeko. Ezaugarri horietako batzuk edo guztiak infekzio kroniko batean sor daitezkeela uste dute, Nature-n argitaratutako artikulu baten arabera.

Zenbait pertsonatan, SARS-CoV-2aren infekzioa asko lutzatzen da, baita hilabetetan ere. Halako kasu bati egindako jarraipenean, ikertzaileek frotatu zuten birusa aldatzen zihoala, eta sortzen ziren mutazioetako asko bat datozela gehien hedatu diren aldaerek dituztenekin. Kasu jakin hartan, omicron aldaerak dituenekin.

COVID-19a azaldu zenetik eta pertsonatik pertsonara transmititzean izan duen bilakera aztertuta, ondorioztatu dute bi ezaugarri nagusik gidatu dutela eboluzioa: infektatzeko gaitasuna, eta immunitate-sistemari ihes egitekoa.

Infekzio akutuek 1-2 aste irauten dute, eta, beraz, ez dago denborarik ezaugarri jakin bat duen aldaera besteari gain hartzeko. Infekzio kronikoetan, berriz, mutazio desberdinak dituzten bertsioek elkarren aurka lehiatzeko denbora dute.

Horrenbestez, infekzio kronikoetan gertatzen diren mutazioak ikertzea lagungarria izan daiteke zer aldaera arriskutsu sortuko diren aurreikusteko, baina aitortu dute oraindik alderdi asko dituztela argitzeko eta ulertzeko. Adibidez, ez dira ondo ezagutzen infekzio kronikoa izateko arrazoiak. Bat, garbia, immunoeskasia izatea da; baina immunitate-sistema osasuntsua duten pertsonetan ere gertatzen da batzuetan. Eta kasu larriak prebenitzeko hartzen diren antibiralek (Paxlovid, esaterako), behar baino denbora luzeagoan hartzen badira, erresistentziak sortzea eragin dezaketela ohartarazi dute.

Nolanahi ere, infekzio kronikoa duten pertsonei arreta jartzea eskatu dute, baita sintoma arinak badituzte ere; lehenik eta behin, haien osasunarengatik, eta, gainera, populazio osoarengatik.