COVID-19ari aurre egiteko pilula antibiralak, bidean

Galarraga Aiestaran, Ana

Elhuyar Zientzia

covid-19ari-aurre-egiteko-pilula-antibiralak-bidea
Molnupiravir antibiralak Erresuma Batuaren eta EMAren onespena lortu du larrialdiko erabilerarako. Arg. Merck

Berriki, ahotik hartzeko bi antibiral izan dira albiste, SARS-CoV-2aren ondorioak kontrolpean izateko eman dezaketen laguntzarengatik: Molnupiravir eta Paxlovid. Izan ere, orain arte ez zegoen sintomak apaltzeko berariazko tratamendu errazik. Lehena Merck konpainiarena da, eta irailaren 5an lortu zuen larrialdiko erabilerarako baimena Erresuma Batuan. Handik gutxira, Europan erabiltzeko ateak ireki zizkion EMA sendagaien europako agentziak. 

Erribonukleosido baten analogo bat da, eta birusaren erreplikazioan eragiten du. Hain zuzen, erreplikazio-prozesuan birusak analogo hori barneratzen du, eta, beraz, mutazio bat sortzen da. Horren ondorioz, birusak ezin du erreplikatzen jarraitu. Beste RNA-birusen aurka ere probatu izan da, adibidez, gripearen birusaren aurka, eta, SARS-CoV-2aren kasuan, frogatu zuten % 50eko eraginkortasuna duela ospitaleratzearekiko eta heriotzarekiko, arrisku faktoreak zituzten infektatuekin.

COVID-19aren lehen sintomak izan eta infekzioa baieztatutakoan hasi behar da tratamendua, eta bost egun irauten ditu. 600 € inguru balio duela aurreratu dute, eta hitzarmen bat egin dute herrialde pobretuetan patenterik ordaindu beharrik gabe ekoizteko eta bantzeko aukera izan dezaten.

Paxlovid antibirala, berriz, Pfizer konpainiarena da. Molnupiravirrek Erresuma Batuaren eta EMAren oniritziak lortu zituen egun berean jakinarazi zituzten II/III faseko emaitzak, eta Molnupiravirrenak baino askoz ere hobeak dira. Hain zuzen, % 89ko eraginkortasuna lortu du ospitaleratzearekiko eta heriotzarekiko, paziente-mota berarekin, hau da, COVID-19 larria garatzeko arrisku-faktoreren bat zutenekin.

Paxlovidek Molnupiravirrek baino lehenago eragiten du birusaren mekanismoan. Izan ere, SARS-CoV-2aren proteasa bat inhibitzen du; horrenbestez, erreplikatzea eragozten du. Molnupiravir bezala, bost egunetan hartu behar da, eta, ritonavir antibiralaren dosi txiki bat gehituz gero, eragina luzatzea lortu dute. FDA AEBko sendagaien agentzia saio klinikoen emaitzak aztertzen ari da orain, eta oso litekeena da, FDAk onartzen badu, EMAk ere baimentzea.

 
Babesleak
Eusko Jaurlaritzako Industria, Merkataritza eta Turismo Saila