Emakume ikustezinak
Industria farmazeutikoak ez du lana behar bezala egiten merkaturatu nahi dituzten botikek emakumeengan izan dezaketen eragina aztertzeko. Horixe dio Estatu Batuetako Kongresuari aurkeztu zaion txosten batek. Txosten horren arabera, herrialde horretan botikak merkaturatzeko “Food and Drug Administration” (FDA) erakundeak emandako prozedurak ez dira behar bezala betetzen emakumeen kasuetarako, eta are gehiago, erakundeak berak kasu horietan ez du prozedura behar bezala kontrolatu.
Txostenak 1988-1991 urte bitartean onartutako 53 botika berriren kasua aztertzen du. Txostenak dioenez, emakumeekin egindako testetan hirutik batean ez da FDA erakundeak ezarri duen 250eko kopurura iritsi. Kopuru hori sexuen araberako erreakzio desberdinak detektatzeko jarritako minimoa da, hain zuzen ere.
Gaixotasun kardiobaskularrentzako 13 botiken artean 8tan ez zen nahikoa saio egin emakumeengan nahiz eta emakumeen heriotza-tasa handiena eragiten dutenak eritasun horiek izan, eta kasu bakar batean zetorren bat frogako subjektuen arteko emakumeen proportzioa botika hori erabili behar zuten gaixoen arteko emakumeen proportzioarekin.
52 botika horien artean 12 kasutan bakarrik aztertu da ahotiko antisorgailuekin edo emakume-hormonekin izan dezaketen elkarrekintza.
Testetarako erabiltzen diren pertsonen ezaugarriak botika hori erabiliko duen populazio-segmentuaren ezaugarrietara ahalik eta gehienen hurbiltzen direla ziurtatzea gomendatzen die txostenak, botiken azterketa klinikoez ardura duten enpresei eta FDA erakundeari. Eta ezaugarri horien artean sexua ez dela inola ere baztergarria, azpimarratzen dute txostengileek; frogatua baitago botikek hainbatetan emakumezko eta gizonezkoengan eragin desberdina izan dezaketela.
Zu idazle
Zientzia aldizkaria
