Bateria organikoak diseinatu dituzte, metalik gabekoak

bateria-organikoak-diseinatu-dituzte-metalik-gabek
Bateria organikoak garatzeko lehenengo urratsa eman dute zientzialariek. Arg. Nature aldizkaritik moldatua.

Litio-ioizko baterien garapenak ondorio zuzenak izan ditu teknologiaren merkatuan: nabarmen ugaritu dira gailu eramangarriak eta ibilgailu elektrikoak. Baina bateria horien hazkunde azkarrak agerian utzi du, era berean, litioa, kobaltoa eta bestelako baliabide mineral mugatuak erauzteak ingurumen-arazo larriak sor ditzakeela, eta, hortaz, ez dela etikoa. Bestetik, litio-ioizko baterien ehuneko txiki bat baino ez da birziklatzen. Texas A&M Unibertsitateko hainbat kimikarik bateria etikoagoak garatzeko proposamena luzatu dute: bateria organikoak sortzea, metalik gabekoak. Eta jada sortu dute lehenengo prototipoa.

Bateria berritzaile horietan, metalak erabili beharrean, kate polipeptidikoak erabili dituzte. Kate horietan talde aktibo modura biologenoak eta nitroxido-erradikalak lotu dituzte, anodo eta katodo gisa funtzionatzen dutenak, hurrenez hurren. 37,8 mA h g-1-eko karga-ahalmen maximoa lortu dute bateriok.

Azido glutamikoan oinarritutako kate polipeptidikoak sortu dituzte, kloro- edo alkinilo-taldeak gehituta, erredox-aktibitatea izan dezaten. Ikertzaileek adierazi dute material organiko aktiboak egonkor mantentzea lortu dutela, bateria funtzionatzen ari den bitartean, eta, ondoren, baldintza azidoetan jarrita degradarazi daitezkeela: kate polipeptidikoak berriz ere aminoazido bihurtzen dira, beste degradazio-produktu batzuekin batera. Badirudi, beraz, birziklagarriak izan daitezkeela, eta litio-iozko bateriek baino segurtasun-arazo txikiagoak eragingo lituzketela.

Bateria organikoak garatzeko lehenengo urratsa baino ez da, erronka teknologiko handiak baitituzte etorkizunera begira: besteak beste, material aktiboa ez dadila disolbatu eta bateriaren ahalmena handitzea.

Gehitu iruzkin bat

Saioa hasi iruzkinak uzteko.

Babesleak
Eusko Jaurlaritzako Industria, Merkataritza eta Turismo Saila
MAIER Koop. Elk.
KIDE Koop. Elk.
ULMA Koop. Elk.
EIKA Koop. Elk.
LAGUN ARO Koop. Elk.
FAGOR ELECTRÓNICA Koop. Elk.