Zergatik du Saturnoren B eraztunak binilozko disko baten antza?

Zergatik du Saturnoren B eraztunak binilozko disko baten antza?
2011/02/01 | Elhuyar
(Argazkia: NASA)

Hiru hamarkadaz, Saturnoren eraztunik distiratsuena eta masiboena denetan misteriotsuena ere izan da. B eraztunak ildo ilunak ditu, eta ildo horiek binilozko disko baten antza ematen diote. Baina horiek nola sortzen ote diren argitu ezinik ibili dira zientzialariak. Orain Boulder-ko (Colorado) Espazio Zientzien Institutuko ikertzaileek azaldu dutenez, eraztunen parterik dentsoenek joera naturala dute eraztunen banda dentsoago eta distiratsuago batzuetan biltzeko.

Ondorio horretara iristeko, Cassini zundak lau urtean B eraztunari atera dizkion milaka irudi aztertu dituzte astronomoek. Eraztunaren kanpoko ertzeko posizioan hiru pultsazio erritmiko ahul identifikatu dituzte. Oszilazio horiek, erritmo berean, ertza barnera eta kanpora mugitzen dute --75 bat kilometro--.

Ikertzaileek diotenez, prozedura hori B eraztunean soilik gerta daiteke, han partikulak elkarrengandik oso gertu daudenez, gehiago jokatzen baitute likido bezala gas bezala baino. Zorizko asaldura txikiek are gehiago hurbiltzen dituzte; eta, ondorioz, partikulen uhin edo olatu modukoak eragiten dituzte, eraztunaren ertzean sumatutako frekuentzia berberekin. Eraztuneko partikulen arteko talka leunek uhinak anplifikatzen dituzte, haiek B eraztuneko ertzean pultsazio gisa agertzeko adinako indarra izan artean. Seguruenik, berez sortzen diren uhin horiei zor zaie Saturnoren B eraztuna zirrikituz beteta dagoen itxura hori.

Astronomoek uste dute izarrengandik gertu dauden beste hauts-disko, galaxia espiral edo gasezko planeta batzuetan ere izan daitezkeela antzeko oszilazioak. Orain artean, ordea, ezin izan da baieztatu haien existentzia.

1
272
2011
2
015
Astronomia
Albisteak
16

Gehitu iruzkin bat

Saioa hasi iruzkinak uzteko.

Babesleak
Eusko Jaurlaritzako Industria, Merkataritza eta Turismo Saila
MAIER Koop. Elk.
KIDE Koop. Elk.
ULMA Koop. Elk.
EIKA Koop. Elk.
LAGUN ARO Koop. Elk.
FAGOR ELECTRÓNICA Koop. Elk.