SARSaren birusaren eta saguzarren arteko lotura aurkitu dute

Carton Virto, Eider

Elhuyar Zientzia

sarsaren-birusaren-eta-saguzarren-arteko-lotura-au
Txinako ferra-saguzarra, Rhinolophus sinicus, gizakia ere infektatzen duen SARSaren birusaren gordailu naturala izan daitekeela uste dute ikertzaileek. Arg. Dr. Libiao Zhang / Guangdong Entomologia Institutua, Txina Hegoaldeko Mehatxatutako Animalien Institutua

Gizakiarengan ez-ohiko pneumonia eragiten duen birusaren oso antzeko bi aldaera identifikatu dituzte Txinako ferra-saguzarretan Wuhango Birologia Institutuko ikertzaile batzuek gidatutako ikerketan, Nature aldizkarian berri eman dutenez.

SARSa eragiten duen koronabirusaren gordailu naturalak saguzarrak izan zitezkeela aspaldi susmatzen zuten ikertzaileek, baina, orain arte Txinan, Europan eta Afrikan identifikatutako aldaerek ez zuten bat egiten gizakia infektatzen duen aldaeraren ezaugarriekin: zehazki, ezin zuten erabili azken horrek baliatzen duen giza errezeptorea zelulak infektatzeko.

Txinako ferra-saguetan identifikatu dituzten bi aldaerek, aldiz, badute gaitasun hori, eta, horregatik, ikerketaren egileek adierazi dute “saguzarren hipotesiaren” orain arteko froga sendoena dela aurkikuntza.

Birusen laginak saguzarren gorozkietatik jaso dituzte, eta analisi morfologiko eta genetiko bidez identifikatu dituzte bi aldaera berriak. Ikertzaileen esanean, gainera, in vitro egindako atariko probek iradokitzen dute aldaera horiek gaitasuna izango luketela gizakia zuzenean infektatzeko, bitarteko ostalari baten beharrik izan gabe.

SARS birusak eragindako ez-ohiko pneumonia gaitz larria da, eta, pandemia eragiteko gaitasuna du. Horregatik, arreta handiz jarraitzen diote birusaren aldaerei osasun-arduradunek.
Babesleak
Eusko Jaurlaritzako Industria, Merkataritza eta Turismo Saila