DNA datuak gordetzeko aproposa dela frogatu dute, film bat DNA bihurtuta

Elhuyar Zientzia

Zabaldu:
Twitter
Facebook
Emaila

dna-datuak-gordetzeko-aproposa-izan-daitekeela-fro

Arg. Artxibokoa

Lumière anaien L'arrivée d'un train à La Ciotat filma (1895) DNA bihurtu dute Columbia Unibertsitateko bi zientzialarik. Horretarako, kode bitarrean 0 eta 1en bidez adierazitako informazioa DNAren base nitrogenatuetara (A, C, G, T) itzultzen duen algoritmo bat sortu dute. Lehen ere, egin dira antzeko probak, baina akatsak ematen zituzten eta mugatuak ziren. Science aldizkarian azaldu dutenez, ordea, haiek garatutako metodoa erabat fidagarria da eta orain artekoek baino informazio gehiago gordetzeko aukera ematen du.

Esaterako, beste metodoek akatsa ematen zuten base nitrogenatu bat jarraian askotan errepikatzen bazen. Columbiako ikertzaileek eragozpen hori gainditzea lortu dute, konbinazio horiek beste sekuentzia batzuekin ordezkatuta. Beste hobekuntza batzuk ere egin dituzte, eta DNA Iturria deitu diote garatutako algoritmoari. Hura erabilita egin dute filmaren proba: filmaren kode bitarra kode genetikora itzuli, hura sintetizatzera laborategi batera bidali (Twist Bioscience, San Frantzisko, Kalifornia), han DNA bihurtu, atzera Columbian jaso, eta deskodetuta, filma ikustea lortu dute, batere akatsik gabe.

Prozesua garestia dela aitortu duten arren, denborarekin merketu eta eskuragarria izango dela espero dute.