Diabetesaren aurkako botika bat eraginkorra da pisua galtzeko

Etxebeste Aduriz, Egoitz

Elhuyar Zientzia

diabetesaren-aurkako-botika-bat-eraginkorra-da-pis
Arg. Tumisu/Pixabay

Orain arte II motako diabetesa tratatzeko erabili den botika bat pisua galtzeko benetan eraginkorra dela ikusi dute, eta ez duela albo-ondorio garrantzitsurik eragiten. Kirurgiaz gain, gaur egun ez dago bi baldintza horiek betetzen dituen beste tratamendurik; dauden botikak ez dira oso eraginkorrak, eta erabilera asko mugatzen duten albo-ondorioak dituzte.

Semaglutide izena du botikak, eta diabetesa tratatzeko baino dosi handiagoan probatu dute, nazioarteko saio kliniko batean. Hamasei herrialdetako 2.000 pertsonak, astean behin, semaglutide-dosi bat edo plazeboa hartu zuten, injekzio bidez, 68 astez. Eta, aldi berean, bizitza-ohiturak ere aldatu zituzten, dietari eta ariketa fisikoari dagokionez. Semaglutidea hartu zutenek pisuaren % 15 galdu zuten, eta plazeboa hartu zutenek, berriz, % 2,4. Kasu gutxi batzuetan goragalea, beherakoa eta idorerria eragin zituen; eta, gehienetan, epe laburrean desagertu ziren arazo gastrointestinal horiek. The New England Journal of Medicine aldizkarian argitaratu dituzte emaitzok.

Gure gorputzak elikagai-kopuru handi bat hartzen duenean jariatzen duen GLP1 hormona imitatzen du semaglutideak; eta, hala, gosea kentzen du. Saioan parte hartu duten batzuek adierazi dute saioa bukatutakoan berriz gosea sentitzen hasi zirela, eta pisua hartu dutela. Hain zuzen ere, orain 5 urteko saio-kliniko bat jarri dute abian, ikusteko epe luzean pisu-galerari eustea posible den, eta dosi horretan eta epe luzean bestelako albo-ondoriorik ager daitekeen.

Gehitu iruzkin bat

Saioa hasi iruzkinak uzteko.

Babesleak
Eusko Jaurlaritzako Industria, Merkataritza eta Turismo Saila
MAIER Koop. Elk.
KIDE Koop. Elk.
ULMA Koop. Elk.
EIKA Koop. Elk.
LAGUN ARO Koop. Elk.
FAGOR ELECTRÓNICA Koop. Elk.