Alzheimeraren kontrako Lecanemab botika baimentzea erabaki du EMAk, fase goiztiarrean
Sendagaien Europako Agentziak, EMAk, Leqembi (Lecanemab) sendagaiaren ebaluazioa aldatzea erabaki du. Hain zuzen, alzheimerrak eragindako narriadura kognitibo arina edo dementzia goiztiarra tratatzeko diseinatuta dago Lecanemab, baina, dituen albo-ondorioengatik, 2024ko uztailean, EMAk baimena ukatu zion. Orain, berriz, Giza Erabilerarako Sendagaien Batzordeak (CHMP) aldeko gomendioa eman du, paziente guztientzat izango ez bada ere.
Zehazki, ApoE4 genearen kopia bakarra edo bat ere ez duten pazienteentzat bakarrik baimenduko da, aldaera genetiko horrek nabarmen handitzen baititu albo-ondorio larriak garatzeko arriskua, hala nola garuneko hantura edo odoljarioak.
Onurei erreparatuta, saio klinikoetan, lecanemabek frogatu zuen alzheimerraren sintomen aurrerapena % 27 moteltzen duela, plazeboarekin alderatuta. Tratamenduak, ordea, neurri zorrotzak eskatzen ditu. Pazienteek erresonantzia magnetikoak egin beharko dituzte tratamendua hasi aurretik eta tratamenduan zehar, konplikazioak detektatzeko. Gainera, botika ez da egokia antikoagulatzaileak hartzen dituztenentzat, garuneko odoljarioak izateko arrisku handia baitago.
EMAk sarbide kontrolatuko programa bat ezarri du, farmakoa gomendatutako populazioan soilik ematen dela bermatzeko. Arriskuak minimizatzeko neurriak ere eskatzen ditu, hala nola osasun-profesionalen prestakuntza, pazienteentzako ohartarazpen-txartelak eta tratamenduaren segurtasunari buruzko jarraipen-azterketak.
Leqembi zain barnetik ematen da, bi astean behin. Orain, CHMPren gomendioa Europako Batzordera bidaliko dute, behin betiko onartzeko. Ondoren, estatukide bakoitzak erabakiko du bere osasun-sistemaren barruan nola eskainiko duen.
Horrenbestez, EMAren babesa aurrerapauso nabarmena da alzheimerraren tratamenduan, baina kontuan izanda paziente-talde jakin bati mugatua dagoela, onurak bermatzeko eta albo-ondorio larriak saihesteko.
Gai honi buruzko eduki gehiago
Elhuyarrek garatutako teknologia
Zu idazle
Zientzia aldizkaria
