Martetik lurrera

Galarraga Aiestaran, Ana

Elhuyar Zientzia

martetik-lurrera

"Antropologo bat Marten bezala sentitzen naiz gehienetan". Oliver Sacks neurologoaren esanean, irudipen hori du bere buruaz Temple Grandinek, eta esapide hori erabili zuen Sacksek bere liburuetako bati izenburua emateko.

Liburu horretan Grandinen gorabeherak kontatzen ditu. Grandin autista da, baina dituen berezitasunek ez diote galarazi Coloradoko Unibertsitateko Animalien Zientzien Departamentuan lan egitea. Grandinekin batera, marrazkigintzarako, musikarako, dantzarako edo beste arte-diziplina batzuetarako dohain apartak dituzten beste autista batzuk ere agertzen dira Antropologo bat Marten liburuan.

Hain zuzen ere, egilearen arabera, autisten % 10 inguruk azaltzen du trebezia nabarmenen bat, eta kasu horietako batzuk dira Antropologo bat Marte -ren azken bi kapituluen protagonista. Gainerako atalak, berriz, bestelako asaldura neurologikoak dituzten pertsonei buruzkoak dira. Guztira, liburu interesgarria bezain gozagarria osatzen dute, giza garunaren funtzionamendu arrunta eta ezohikoa zein gure jokabideak ulertzeko aproposa.

Edonola ere, oso bestelako bi liburu gomendatu dituzte Gautenako profesionalek. Biek ere autistekin lantzeko estrategiak azaltzen dituzte. Autismo con discapacidad intelectual grave. Guía para padres y profesionales da bat, eta adimen-urritasun larriak dituzten autistei laguntzeko metodoak jasotzen ditu, eremu desberdinetan erabitlzeko (eskolan, familian, heldutasunera iristean...) eta hainbat alderditan, hala nola jokabide-arazoetan, sexualitatean, komunikazioan, trebezia sozialetan...

Gautenak gomendatutako beste liburua orokorragoa da, espektro autistaren nahasteak dituzten pertsona guztiekin lantzeko moduko ariketak proposatzen baititu. Manual del juego para niños con autismo. Ejercicios, materiales y estrategias du izenburutzat, eta, egileen arabera, liburu praktikoa da. Funtsean, autistek etxekoekin zein profesionalekin jolasteko ideiak, materialak eta laguntza eskaintzen ditu.

Antropologo bat Marten
Jatorrizko izenburua: Anthropologist on Mars (1995)
Oliver Sacks
Itzultzailea: Xabier Olarra
Euskal Herriko Unibertsitateko Argitalpen zerbitzua, 2003
ISBN: 84-8373-563-6
Autismo con discapacidad intelectual grave. Guía para padres y profesionales
Rita Jordan
Autismo Ávila, 2012
ISBN: 978-84-940322
Manual del juego para niños con autismo. Ejercicios, materiales y estrategias
Anabel Cornago, Maite Navarro eta Fatima Collado
Psylicom, 2013
ISBN: 978-84-941000-9-3

Gehitu iruzkin bat

Saioa hasi iruzkinak uzteko.

Babesleak
Gipuzkoako Foru Aldundia
IRIZAR Koop. Elk.
MAIER Koop. Elk.
KIDE Koop. Elk.
ULMA Koop. Elk.
EIKA Koop. Elk.
LAGUN ARO Koop. Elk.
TAJO Group