Uharte ikusgarriak

Mundu honetako txoko ikusgarri askok uharte-forma dute. Ikusgarriak dira hainbat uhartetan barneratuta ikus daitezkeen paisaia, flora eta fauna. Baina, kasu honetan, goitik begiratu diegu, espaziotik. Eta ikuspuntu horretatik ere ikusgarriak izan daitezke uharteak.

Maalhosmadulhu atoloiak, Maldivak
Egilea: NASA/GSFC/METI/ERSDAC/JAROS & U.S./Japan ASTER Science Team

Maalhosmadulhu atoloiak, Maldivak

Indiako Ozeanoan, 26 atoloitan banatutako 1.192 uharte dira Maldivak. Asiako herrialderik txikiena da, bai azaleraz, eta baita populazioz ere (300 km2 eta 396.000 biztanle). Eta munduko altuera txikieneko herrialdea ere bada: batez beste 1,4 metro ditu, eta punturik altuenean 2,3 m.

Onekotan
Egilea: NASA

Onekotan

Errusian, Japoniaren eta Kamtxatka penintsularen arteko Kuril uharteetan dago Onekotan. Duela 9.000 urte uhartearen hegoaldeko sumendiak eztanda egin zuenean sortutako galdara urez bete zen, eta galdara haren erdian bigarren kono bolkaniko bat sortu zen gero. Hortaz, uhartearen barruan beste uharte bat dago, eta han dago uharte osoko punturik altuena: 1.325 m.

Eleuthera
Egilea: NASA

Eleuthera

Bahametako 29 uharteetako bat da Eleuthera; luzea eta mehea. 128 km luze da (argazkian hegoaldeko muturra bakarrik ikusten da), eta puntu batzuetan kilometro eta erdi inguruko zabalera baino ez du. Uhartearen mendebaldera, urpeko dunek paisaia ikusgarria osatzen dute. Koral-arrezifeetatik higatutako kaltzio karbonatoa itsaslasterren eraginez pilatuta sortu dira.

Henrietta
Egilea: NASA

Henrietta

Ekialdeko Siberiako Itsasoan, De Long artxipelagoko uharte iparrekoena da Henrietta. Sei kilometro inguruko diametroa du, eta azaleraren % 40 glaziarrez estalita dago.

Alejandro Selkirk
Egilea: NASA/USGS

Alejandro Selkirk

Txileko Juan Fernandez artxipelagoan dago uharte txiki hau. 48 m2 baino ez dituen arren, 1.650 m-ko altuera du; laino-geruzan eragiteko nahikoa. Uhartea oztopo bat da haizeak mugitzen dituen lainoentzat, eta, uhartearen inguruan mugimendu hori mantsotzearen ondorioz, zurrunbiloak eratzen dira uhartearen bi aldeetan.

Gehitu iruzkin bat

Saioa hasi iruzkinak uzteko.

Webgune honek cookieak erabiltzen ditu zure nabigazio-esperientzia hobetzeko. Nabigatzen jarraitzen baduzu, ulertuko dugu cookie horien erabilera onartzen duzla. Ezeztatuz gero, ezingo duzu webgune honetan nabigatu. Onartu
Informazio gehiago
Babesleak
Eusko Jaurlaritzako Industria, Merkataritza eta Turismo Saila
MAIER Koop. Elk.
KIDE Koop. Elk.
ULMA Koop. Elk.
EIKA Koop. Elk.
LAGUN ARO Koop. Elk.
FAGOR ELECTRÓNICA Koop. Elk.