Mikroskopioaren argitan

Egilea: Teresa Zgoda eta Teresa Kugler (AEB)

Dortoka-enbrioi fluoreszentea

“Mikroskopiari esker, izaki txikienetara eta gure mundua osatzen duten osagaietara hurbildu gaitezke, eta bestela oharkabean pasatzen diren bizitzako gauza txikiei beha diezaiekegu”, dio Teresa Kugler graduatu berriak. “Mikroskopioaren bidez ikusten ditugun irudi ederrek inspiratu egiten gaituzte”, eransten du Teresa Zgoda mikroskopia-teknikariak.

Inspirazio hori lagun, eta pazientzia, zehaztasuna eta eskarmentua oinarri, sortu zuten dortoka-enbrioi baten irudi hau. Mikroskopia estereoskopikoa eta fluoreszentzia erabili zituzten, eta dortoka-enbrioiaren tamaina (zentimetro pare bat) zailtasun bat izan zen, zati oso txiki bat gelditzen zelako plano fokalean. Horregatik, ehunka irudi josiz osatu zuten azken irudi koloretsua.

Nikon Small World lehiaketaren 2019ko edizioko irabazlea izan da irudi hau. Lehiaketara aurkeztu diren irudietatik beste hainbat ere nabarmendu zituen epaimahaiak, eta haietako batzuk dituzue jarraian.