Beste primate baten genoma sekuentziatuta
Rhesus makakoaren DNAren sekuentzia lortu dute. Asian ugaria da espezie hori, eta medikuntzan oso erabilia, botika berriekin probak egiteko. Ikertzaileen arabera, makakoetan probatzen ari diren botikek gizakiengan beste eragin bat izango duten aurreikusteko gai izango dira orain. Izan ere, ohartu dira makakoen eta gizakiaren geneen arteko desberdintasun asko immunitate-sistemari dagozkiola. Baina, gainera, pentsatzen dute makakoaren genomak informazioa emango duela eboluzioa hobeto ulertzeko, baita gizakia zerk egiten duen gizaki jakiteko ere.
Eta, dagoeneko, ari da informazioa ematen. Azukrearen digestioan inplikatuta dagoen gene-talde bat aurkitu dute, eta ikusi dute makakoetan gizakian baino proportzio handiagoan dagoela. Oraingoz azalpen hau eman diote: fruitutan oso aberatsa den dieta hartzera eraman zituen moldaera genetikoa da.
2005ean txinpantzearen genoma sekuentziatu zuten, eta ikusi zuten DNAren % 98 berdina dutela haiek eta gizakiek. Makakoen eta gizakiaren lerro ebolutiboak duela 25 milioi urte bereizi zirela uste da; hortaz, makakoak txinpantzeak baino ahaide urrunagoak dira gizakiarentzat. Hala ere, hiru primate horien genomak konparatuz, gauza asko ikastea espero da.
Zu idazle
Zientzia aldizkaria
