Lurraren berotzeak antzinako euri-oihan tropikaletako dibertsitatea handitu zuen

Lurraren berotzeak antzinako euri-oihan tropikaletako dibertsitatea handitu zuen
2011/02/01 | Elhuyar

Zientzialari gehienek aurreikusi dute karbono dioxidoaren mailak gora egin eta Lurra berotzen doan neurrian oihan tropikaletako landareen dibertsitatea murriztuz joango dela. Baina Panamako Smithsonian Tropical Research Institute-ko ikertzaileen arabera, iraganean, klima oso azkar berotu zen garai jakin batean, gehiago izan ziren oihanean sortutako landare-espezie berriak galbidean jarri zirenak baino.

Duela 56,3 milioi urte, Paleozeno/Eozenoko Gailur Termikoa deritzonean, Lurra 3 eta 5 gradu artean berotu zen, eta, 10.000 urteko denbora-tartean, dioxido karbonoaren kantitatea bikoiztera ere iritsi zen. Ezohiko baldintza haiek 200.000 urtez iraun zuten. Kolonbiako eta Venezuelako oihanetako polen-ale fosilduak aztertuta, ikusi dute garai hartan zenbait landare-espezie desagertu baziren ere askoz ere espezie berri gehiago sortu zirela.

Bestalde, ikerketaren ondorioak zuhurtziaz hartu behar direla diote zientzialariek. Norbaitek ondoriozta lezake egungo klima-aldaketak ere onurak ekar litzakeela euri-oihanentzat. Baina ustezko efektu positiboak ezerezean gera litezke, adibidez, tenperaturak azkarregi igoko balira, landareek ez bailukete aukerarik izango egoera berrira egokitzeko. Gainera, ur-eskasia ere kritikoa izan liteke; Gailur Termikoan ez zen ur faltarik izan, baina, egungo aurreikuspenen arabera, litekeena da etorkizunean horrela ez izatea.

1
272
2011
2
002
Klimatologia; Ingurumena
Albisteak
7

Jarrai iezaguzu

Zu idazle

Zientzia aldizkaria

azken alea
Babesleak
Eusko Jaurlaritzako Industria, Merkataritza eta Turismo Saila
MAIER Koop. Elk.
KIDE Koop. Elk.
ULMA Koop. Elk.
EIKA Koop. Elk.
LAGUN ARO Koop. Elk.
FAGOR ELECTRÓNICA Koop. Elk.