Ikusmena eta ukimena elkartuta daude enbrioan, eta jaiotakoan bereizten dira

Galarraga Aiestaran, Ana

Elhuyar Zientzia

ikusmena-eta-ukimena-elkartuta-daude-enbrioan-eta
Sagu baten kortexaren aktibitatea jaio berritan, ezkerrean, eta erretinako uhinak blokeatu zaizkion beste batena, eskuinean. Arg. Alancanteko Neurozientzien Institutua, CSIC-UMH

Saguetan egindako esperimentuetan frogatu dute ikusmena eta ukimena batera aktibatzen direla enbrioan. Science aldizkarian argitaratu da ikerketa, eta, haren arabera, bi zentzumenak jaiotzean bereizten dira, erretinak igortzen dituen aktibitate-uhinen eraginez.

Ikerketaren egileek, Alacanteko Neurozientzien Institutuko ikertzaileek frogatu dute, in vivo, sagu-enbrioiak ukimen-estimulu batekin kitzikatuz gero, kortex somatosentsorial primarioarekin batera (ukimenaz arduratzen den eremuetako bat), ikusmen-kortexa ere aktibatzen dela. Bateratze hori erditu bezperan baieztatu zuten; jaio ondoren, ordea, zentzumenak banatuta zeuden. Eta ikusi dute horretarako ezinbestekoa dela erretinatik aktibitate-uhinak iristea.

Bi zentzumenen bereizketa goi kolikulua izeneko egitura batean gertatzen da, jaiotzaren inguruko denbora-tarte jakin batean. Hain zuzen, jaiotakoan erretinako seinaleak blokeatuz gero, bi zentzumenek nahasita jarraitzen dute goi kolikuluan. Horren ondorioz, saguek ikusmen-arazoak dituzte.

Horrenbestez, ikerketak agerian jarri du bi zentzumenak bereizteko denbora-tarte horren garrantzia: goi kolikuluan bereizketa atzeratzen bada, ukimenaren eta ikusmenaren nahasmendu iraunkorra sortzen da.

 

Gai honi buruzko eduki gehiago

Elhuyarrek garatutako teknologia

Jarrai iezaguzu

Zu idazle

Zientzia aldizkaria

azken alea
Babesleak
Eusko Jaurlaritzako Industria, Merkataritza eta Turismo Saila
MAIER Koop. Elk.
KIDE Koop. Elk.
ULMA Koop. Elk.
EIKA Koop. Elk.
LAGUN ARO Koop. Elk.
FAGOR ELECTRÓNICA Koop. Elk.