Gaixo eta logale? Hala behar du

Gaixo eta logale? Hala behar du
2007/11/01 | Elhuyar
(Argazkia: Artxibokoa)

Nahikoa lo egitea ezinbestekoa da immunologia-sistema indartsua izateko. Gainera, gaixoek logalea izaten dute, eta sendagileek askotan frogatu dute lo egiteak infekzioak gainditzen laguntzen duela. Gaixoarentzat ez ezik, populazioarentzat ere onuragarria da gaixoa ohean geratzea; hala, gaitza kutsatzea saihesten da.

Gaixoaldian logalea sorrarazten duen proteina identifikatu dute ikertzaileek. TNF-alfa du izena (tumour necrosis factor alpha), eta ezaguna da tumoreen aurka erabiltzen delako, eta baita hanturarekin lotura duelako ere. Adibidez, TNF-alfarekin tratatzen diren minbizi-pazienteek logura izaten dute albo-ondorio gisa.

Apnea duten gaixoek egunez lo har ez dezaten, eta beste gaixotasun kroniko batzuk sortzen duten nekea gainditzeko, TNF-alfa proteina blokeatzen duten botikak ematen dira batzuetan. Orain, ordea, badakite proteinak immunologia-sisteman eragina duela, eta baita erritmo zirkadianoan ere, nonbait. Hortaz, halako botikak ematen jarraitu baino lehen, gehiago ikertu beharko dela uste dute ikertzaileek.

1
236
2007
11
010
Anatomia/Fisiologia; Medikuntza
Berriak labur
6
Babesleak
Eusko Jaurlaritzako Industria, Merkataritza eta Turismo Saila